ഈ അച്ഛനു ഇതിന്റെ വല്ല ആവശ്യോം ഉണ്ടോ?

ഞങ്ങളുടെ ഒരു ബന്ധു എറണാകുളത്ത് പുതിയൊരു ഫ്ലാറ്റ് വാങ്ങിച്ചു. അതു കാണാന്‍ അച്ഛനും അമ്മയും ഞാനുംകൂടി പോയി.

ഞങ്ങള്‍ ഫ്ലാറ്റ് കാണാന്‍ ചെന്നതില്‍ അവിടുത്തെ ആന്റി വളരെ  സന്തോഷത്തിലായിരുന്നു. ചെന്നു കയറിയതു മുതല്‍ ഫ്ലാറ്റിനെക്കുറിച്ചും, അവിടത്തെ സൗകര്യങ്ങളെക്കുറിച്ചും, അവിടെ താമസിക്കുന്ന വി.ഐ.പികളെ കുറിച്ചുമൊക്കെ അവര്‍ വാ തോരാതെ സംസാരിക്കാന്‍ തുടങ്ങി. ഞങ്ങളുടെ ബില്‍ഡേഴ്സ് അപ്പടിയാണ്‌, ഇപ്പടിയാണ്‌. ഇവിടെ ആ ഫെസിലിറ്റിയുണ്ട്, അതുണ്ട്, ഇതുണ്ട് അങ്ങിനെ..

പിന്നെ തൊട്ടപ്പുറത്തെ ഫ്ലാറ്റില്‍  ഒരു ലണ്ടന്‍ റിട്ടേണ്‍‌ഡ് ഡോക്ടറാണ്‌ താമസിക്കണേ, അയാള്‍ക്ക് ബി.എം. ഡബ്ല്യൂ കാറുണ്ട്. സിനിമാനടന്‍ ബാലചന്ദ്രമേനോന്‍ ഇവിടെയാണ്‌ താമസിക്കുന്നത്. സിനിമാനടന്‍ ദിലിപ്‌ ഇവിടെ ഒരു ഫ്ലാറ്റ് വാങ്ങിച്ചിട്ടുണ്ട്. അങ്ങിനെ അവരു പറഞ്ഞു പറഞ്ഞ് കത്തിക്കേറി. 

ഇതിനൊരു ഫുള്‍ സ്റ്റോപ് പോയിട്ട് ഒരു കോമയെങ്കിലും എങ്ങിനെ ഇടും എന്നു ഞാന്‍ ആലോചിക്കാന്‍ തുടങ്ങി.

അപ്പോഴാണ് അതു സംഭവിച്ചത്.  അത്രയും നേരം അവരുടെ ഈ വീരശൂരപരാക്രമങ്ങള്‍ എല്ലാം കേട്ട് മൗനം കുടിച്ചു കൊണ്ടിരുന്ന അച്ഛന്‍ പെട്ടെന്ന് ഒരു ചോദ്യം..

"ഇത് എത്ര സെന്റുണ്ട്?"

ആ ചോദ്യം കേട്ട് അവരൊന്നു ഞെട്ടി. എന്നിട്ട് പറഞ്ഞു "ഫ്ലാറ്റ് ആയിരത്തഞ്ഞൂറ് സ്വകയര്‍ ഫീറ്റുണ്ട്"

"അതല്ല ചോദിച്ചേ, ഇവിടെ നിങ്ങള്‍ക്ക് എത്ര സെന്റ് സ്ഥലം ഉണ്ട്?"

അപ്പോള്‍ അവര്‍ ആകെയൊന്നു പരുങ്ങി. എന്നിട്ട് മെല്ലെ പറഞ്ഞു "ഒരു രണ്ടു സെന്റ് സ്ഥലം കാണും"

"അതുശരി. അപ്പോള്‍ ഒരു ഭൂമികുലുക്കം വന്നു എന്നു വെയ്ക്ക്യാ, അല്ലാ, വരില്യ, സപ്പോസ് അങ്ങിനെ വന്നു എന്നു കരുത്യാ? അപ്പോള്‍ നിങ്ങള്‍ക്ക് ഈ ബില്‍ഡേഴ്സ് രണ്ട് സെന്റില്‍ വീട് പണിത് തര്യോ?"

അത്കേട്ടതും അവരുടെ മുഖം വിളറി വെളുത്തു. 

"അല്ലാ ഞാന്‍ ഇത് പറഞ്ഞൂന്ന് കരുതി അങ്ങിനെ വരൂന്ന്‌ അല്ലാട്ടോ, അങ്ങിനെ കരുതരുത്" അച്ഛന്‍ നല്ല പിള്ള ചമഞ്ഞ് മുന്‍‌കൂര്‍ ജാമ്യം എടുത്തു.

എന്തിനു പറയേണ്ടൂ. അവിടന്ന് ഊണു കഴിച്ച് ഇറങ്ങണ വരെ ഫ്ലാറ്റിനെ കുറിച്ച് ആ ആന്റി കമാ എന്നൊരു അക്ഷരം മീണ്ടിയിട്ടില്യ.

അല്ലാ, ഞാന്‍ അറിയാന്‍ വയ്യാഞ്ഞിട്ട് ചോദിക്ക്യാ

"ഈ അച്ഛനു ഇതിന്റെ വല്ല ആവശ്യോം ഉണ്ടോ?"